مزيون واشباهك ماهيب اربعين

ياصاحبي لاتباطيتك وقلبي حزين
رحت أنشد الدالهين اللي عليهم تمر !

يامعشر اللي على ضو القمر ساهرين
مامرّكم عود موزٍ في علوّه ثمر؟!

الحب مثل العباده ..و أنفس المؤمنين
أشرّها مانفر..وآخيرها ما أستمر

ياليت روحي على روحك تذوب وتلين
وأنا اتكوّن سحابه وأنهمر..وأنهمر!!

نظراتك يعلمنّي ضحكة العاشقين
والا يكتّنّ في راحة كفوفي جمر

بقى مـن اللي خذيته قلب بين أصبعين
وأن قلت:هاته.. مـن عيوني وتامر امر

وأن قلت لي:موقعي مـن عالم الحسن وين؟
بعد العشرين كان الله عطـاني عمر؟!

اقول:مزيون وأشباهك ماهيب أربعين
أشباهك أثنين يا أمّا شمس والا قمر !!

يكفي أنّك أوّل ظبْي ياخذ من الصقر عين
ومـن الـذلول العمانيّه هيام وضمر

معنّقك شبر فوق متونك وقفلتين
و يديك منجم ذهب..و شفاك حانة خمر.!!

مدري وش اللي خذا الله منْك وأعطاك زين
ما لا عطا فارعات الطول بيض وسمر!!

ماشفت هالوردتيـن وشفت هالجمرتين
لهـن عشرين عام ولايزالنّ حمر..!!